Por terceiro ano consecutivo, o Círculo Recreativo Cultural do Porriño volve a abrir un rueiro con nome de mulleres dentro das súas instalacións. De novo, pioneiras, traballadoras ou mulleres destacadas nun ámbito determinado. De novo mirando ao pasado, como ás primeiras concelleiras do municipio, Albina Dib, María del Carmen López Ramos e Eugenia Tovar Andrade, ou como Lola Magno, a primeira fotógrafa do Porriño e unha das pioneiras en Galicia en dedicarse ao retrato fotográfico; pero tamén mirando ao presente, cunha rúa para unha das actrices de teatro máis destacadas no panorama galego, a porriñesa Areta Bolado; a modista Juaniña, unha muller centenaria referente no municipio, ou ao colectivo de pescantinas, recoñecendo de novo un dos oficios que, historicamente, son maioritariamente desenvolvidos por mulleres.

“Mulleres nas rúas foi unha das primeiras iniciativas que desenvolvemos no CRC hai tres anos. Unha das que sen dúbida nesta directiva nos sentimos máis orgullosas e orgullosos”, explica Abel Gallego, o presidente da entidade, lembrando que entón non había rúas do municipio con nome de muller . “Agora si – aclara- pero foron esquecidas durante tanto tempo, e hai tantas mulleres na historia desta vila que merecen ser recoñecidas, que o rueiro quédasenos pequeno”. De feito tres anos despois, teñen unha lista de nomes, de historias, de pioneiras que aínda non se esgotou e que cada ano dende hai tres poñen sobre a mesa, ou neste caso, sobre as paredes do edificio, coincidindo co 8 de marzo, co día que visibiliza a loita da muller. “Porque 8M é unha xornada de visibilización das desigualdades que aínda existen, pero tamén de celebración dos logros acadados grazas á forza colectiva das mulleres e dos movementos feministas”, asegura á directiva.

O 8M é un chamado á sororidade, á reflexión e á acción, por iso o CRC segue a encher as súas rúas de nomes de mulleres, o fan dende unha directiva onde elas son máis, abarcando ademáis, como as súas asociadas, diferentes ámbitos laborais.

A inauguración de este rueiro terá lugar o propio 8 de marzo, ás 18:30h, cun roteiro no que se repasará o perfil de cada rúa. Ao finalizar o roteiro, concerto do grupo Bairro Alto.

Durante un mes, poderá realizarse o percorrido polas instalacións do Círculo para descubrir a estas cinco mulleres. Desde a directiva animan tamén aos centros educativos da vila a participar nesta iniciativa didáctica organizando visitas co alumnado.

As cinco novas rúas son:

EUGENIA TOVAR ANDRADE, MARÍA DEL CARMEN LÓPEZ RAMOS e ALBINA DIB

O 20 de febreiro de 1929, o gobernador civil da provincia de Pontevedra nomeaba concelleiras a Albina Dib e ás mestras de recoñecido prestixio na comarca María del Carmen López Ramos e Eugenia Tovar como concelleiras por ser segundo recolle a prensa da época “personas muy competentes para el desempeño de ls cargos a que han sido nombrados(Sic)”. Deste xeito, convertíanse nas primeiras mulleres en ocupar este posto no Porriño.

DOLORES BLÁZQUEZ “LOLA MAGNO”

Lola Magno foi a primeira fotógrafa do Porriño e unha das pioneiras en Galicia en dedicarse ao retrato fotográfico. A finais dos anos 50 toma o mando do negocio do seu pai e, a partir de aí, foi conformando unha obra de máis de 8.000 imaxes nas que O Porriño quedou para sempre inmortalizado.

JUANA DE LA CRUZ “JUANIÑA”

Juana de la Cruz, Juaniña, foi modista, empresaria e segue a ser unha icona de estilo e vitalidade. Nada en 1925, emprendeu nunha época na que as mulleres non acostumaban a facelo. Pasou dun pequeno obradoiro de costura (1931) no baixo da casa familiar a chegar a empregar a outas 17 costureiras.

ARETA BOLADO

Areta Bolado é unha actriz premiada, unha directora comprometida e unha nena do Círculo. Logo de pasar polo grupo de teatro do CRC e a ESAD, no 2013 funda, xunto a Ailén Kendelman e Noelia Castro a compañía de teatro A Panadaría. Gañou o Premio María Casares 2015 á Mellor Actriz Secundaria con Pan! Pan!, o Premio FETEGA e o Premio María Casares 2018 á Mellor Actriz Protagonista por Elisa e Marcela.

AS NOSAS PESCANTINAS

Coa iniciativa “Mulleres nas rúas”, o Círculo quere tamén recoñecer en poñer en valor os oficios que, historicamente, son maioritariamente desenvolvidos por mulleres. Este ano son as que erguen cedo para ir á lonxa, ás que nos recomendan o mellor produto para nós e as nosas familias. As pescantinas merecían unha rúa no Porriño por todo o que nos aportan a diario.